Die Schnitzelbank

Von Jupiter und Pluto

Wo mir di erschtä Zelt ufgstellt,
gsehnd mir das e Ameisä umerennt.
Us eis mach zwai, mach drü, mach vier,
s'het Unmenge vo dene Tier.

Am Aafang hets in Ströme grägnet,
do simmer scho mit Schlamm denn gsägnet.
Vor em Chuchizelt ei Rutschpartie,
do keit no öppä äs Chind dohi.

Das isch doch gar e kais Problem,
mir löösed das ez ganz bequem:
Mir chared dur di ganzi Schwiiz
En Laschtwage voll vo dänä Schnitz.

Bim Essä träffed sich all Chind,
de Serge schreit bis all stilä sind.
Do chan er schreie wien er wött,
Rueh hend mir bis jetzt no nöd.

Druckluft, Strom und WC- Hüüsli,
dä Komfort, dä freut eus grüüsli.
S'goht zue und her fascht wie im Hotel,
s'Meischt hend mir sogar im Doppel.

Kreisbund, Chrüzbund, Samariter,
mir wüssed langsam nüme wiiter.
Es isch fäng alles chaibä schwär,
drum müend ez au die Nägel här.

S Camp 1 het vil in Usflug investiert,
si hends zumindescht mol probiert.
De falschi Zug, de falschi Bus,
i chume langsam nüme drus.

Hesch scho Stunde müesse stoh,
hesch sicher uf's WC müesse goh.
Wenn nüme so lang chasch warte,
denn hesch leider schlächti Charte.

Hueschte, Chötzle, s'sind all chrank,
D'Helfti vo de Leiter macht kein Wank.
Jede Tag no es paar meh,
morn hesch öppä de letschti gseh.

Z'Zweitä, stehend, im Konvoi,
uf de Seilbahn kenned d'Chind kei Scheu.
D'Leiter müend si an Pfostä binde,
Das tüend d Chind nöd luschtig findä.

Äs Ächzä, Knackä und en Knall,
en Ascht befindet sich im freie Fall.
Zwei Zelter sind halt drunder cho,
s Leiterzelt isch ez übernoh.

S'chrücht und flücht, es isch famos,
d'Angscht vor de Tier isch riisig gross.
D'Chind schnell us em Zelt us wend,
wel döt en Tuusigfüessler rennt.

Über s'Matzelt gits vil z brichte,
do hemmer gfunde tuusig Gschichte.
Hend ihr de Lukas naimed gseh,
i sött em no da Bieli geh.

Ez hemmer denn mit allne Schtriit,
zum Glück isch s'Lagerend nüm wiit.
Drum höred mir ez uf mit üsem Bank,
suscht wärdet die andere au no chrank.